Siglir tar il cuntegn

Surselva Val: Project per in stgaudament a distanza

Ina gruppa da quatter iniziants ha lantschà l’idea da realisar a Val in stgaudament a distanza.

Tals bischens d'in stgaudament a distanza duain en l'avegnir era vegnir installads en chasas a Val.
Legenda: Tals bischens d'in stgaudament a distanza duain en l'avegnir era vegnir installads en chasas a Val. Keystone
  • A Val duai vegnir realisà in stgaudament a distanza.
  • Per realisar quest implant dovri 50 enfin 100 interessents.
  • La finamira è da realisar in implant cun ina prestaziun da almain 1 megawatt.

Durant ina saira d’infurmaziun, che ha cumpiglià in lavuratori ed ina discussiun, han ils iniziants Andreas Oesch, Daniel Berni, Stefan Schmid e Paul Gartmann preschentà il sistem da stgaudament a distanza ed inditgà, co persunas interessadas pudessan sa participar.

La finamira è da chattar 50 enfin 100 interessents. Mo uschia saja pussibel da realisar in implant grond avunda, vul dir cun ina prestaziun da almain 1 megawatt che saja era rentabel, ha il pledader dals iniziants Andreas Oesch manegià.

Il project saja dentant anc betg sviluppà en detagl. L'emprim stoppian els analisar l'interess da la populaziun. Sche l'interess saja gronds avunda - enfin la fin matg vulan els avair ina resposta sin quella dumonda - lura vegnian ils iniziants ad entschaiver cun ina planisaziun pli detagliada e preschentar quella vers la fin da l'atun 2018.