Val S. Pieder survegn 1,5 milliuns damain per halla

La 7132 SA desista dal diever da la halla polivalenta e paja persuenter 1,5 milliuns damain a la vischnanca.

Scola e halla polivalenta da Val S. Pieder Bild in Lightbox öffnen.

Legenda da maletgs: Empè da 6 datti da Remo Stoffel 4,5 milliuns per ina nova halla polivalenta (giudim sanester). RTR, L. Livers

Empè da 12 milliuns francs paja la 7132 SA uschia 10,5 milliuns francs a la vischnanca da Val S. Pieder per la realisaziun dad ina nova halla polivalenta. Quai èn ina giada ils 6 milliuns francs, che la vischnanca ha dabun ord la vendita dal Hotel Therme. Plinavon anc la cumpart da 4,5 milliuns francs che Remo Stoffel e sia 7132 SA avevan empermess per la halla polivalenta. Oriundamain aveva la 7132 empermess 6 milliuns per questa halla. Cunquai che la 7132 SA desista dal diever da la halla polivalenta è questa summa vegnida reducida per 1,5 milliuns francs.

Il vitg da Val S. Pieder Avrir maletg en lightbox.

Legenda da maletgs: En il rudè cotschen è la halla polivalenta. RTR, L. Livers

Surstà ch’igl è gia public

Sco Quai che il president da vischnanca da Val S. Pieder Stefan Schmid ha ditg ad RTR, saja el surstà che questa fatschenta saja gia vegnida preschentada sin la pagina d’internet valsonline.ch. Il messadi tar questa fatschenta saja numnadamain pir en stampa e vegni repartida quests dis a la populaziun da Val. En quest messadi vegnia declerà, daco che la vischnanca desista sin 1,5 milliuns francs. Sco Stefan Schmid di, saja quai numnadamain d’avantatg, sche la vischnanca possia realisar la halla polivalenta senza la 7132 SA.

La preschentaziun da questa fatschenta e la planisaziun da la halla polivalenta è tractandada a la radunanza communala dals 18 da mars. Là vegn decidì, sche la populaziun è cuntenta cun la proposta da la 7132 SA da pajar 10,5 milliuns francs e sa retrair da quest project. Sche la proposta vegn acceptada, fiss la vischnanca la suletta patruna da la halla polivalenta e savess finalmain planisar quella.