Ils 29 da november han votantas e votants da Mustér refusà in credit da quasi 4 milliuns per il project Avertura Val Segnas – Val Sogn Placi. Uss preschenta la suprastanza ina varianta nova al cussegl da vischnanca. Quella na tutga dentant betg la Val Clavaniev.
In cumpromiss
La varianta nova sa cumpona da duas parts: Ina cun access sur la Val Sogn Placi en il guaud dal Run che protegia il vitg da Mustér, l’autra cun access a la Val Segnas/Val da Cuoz cun resguardar las vias da meglieraziun.
Igl è ina schliaziun da cumpromiss che vegn per la vischnanca pli chara.
Investir mintg'onn 300'000 francs
Sco il suprastant per il forestal esser e l’agricultura Clemens Berther di, quintian els che la Confederaziun ed il chantun dettian pli paucs daners, perquai ch’il perimeter saja pli pitschen. Ins stoppia cumenzar a lavurar en omadus lieus il medem mument. Cundiziun saja da cumenzar cun il guaud da Run, in guaud da protecziun per il vitg da Mustér. Ma natiralmain stoppian els era far la Val da Cuoz per che la meglieraziun possia cuntinuar cun sias vias. Ils emprims tschintg fin set onns stuess la vischnanca investir mintg’onn netto 300’000 francs (enstagl da 150’000 francs sco previs en l'emprim project). La finala stoppian els tschertgar lieus per deponer la laina.
Nagin conflict cun la Val Clavaniev
La laina ord la val Clavaniev vegn transportada davent cun helicopter. Quest territori na vegn betg tutgà, e perquai po il president da la corporaziun d’aua Spina da Vin Aluis Flepp acceptar questa schliaziun. El ha gì resalvas vers l’emprim project cun ina via da guaud atras la Val Clavaniev, perquai che quella avess pudì far donn a las tschiffadas d’aua. Cun la varianta nova na vegnian ins ninglur en conflict cun il provediment d’aua e perquai na sajan lur interess betg tangà, ha el ditg a RTR.
Suenter ch’il cussegl da vischnanca da Mustér ha decidì, co enavant, vegn in messadi elavurà. E quel vegn avant il cussegl, e la finala decidan puspè votantas e votants da Mustér.