En la Val Son Pieder ha l'Uffizi da construcziun bassa ils ultims onns adina puspè sanà diversas parts da la via ed er gallarias. Cun il project current, duain las duas gallarias dal «Steintöbeli» vegnir sanadas e rinforzadas fin il 2022.
La siglientada
Il chantun vul siglientar ils radund 400 cubics grip mardi proxim, ils 12 d'october 2021. Per realisar quella e per pudair rumir suenter il material, sto la via vegnir serrada da las 09:40 enfin las 17:00 per tut il traffic sco er per peduns. Sco termin da reserva, perquai che la topografia saja fitg cumplitgada e l'aura po midar, han ins tschernì gievgia ils 14 d'october e mardi ils 19 d'october.
Mesiras per segirar il lieu
Durant lavurs da rumida han ins constattà la stad 2021 ch'i dat instabilitads en il grip. Pli pitschnas sco er ina part gronda. Davent da la via n'è questa part betg da vesair, radund 150 meters sur la via chantunala. Ils scleriments ch'ins haja sinaquai fatg mussian, ch'ins stoppia parter dal fatg ch'il grip è sin crudar. Sche quai capitia, saja da quintar cun donns pli gronds vi da la gallaria u ch'ellas pudessan perfin vegnir destruidas.
Perquai è l'Uffizi da construcziun bassa sfurzà da prender mesiras gia avant sanar las gallarias. Il concept da segirezza prevesa ch'il grip vegnia siglientà tant pli spert, per prevegnir ch'il grip croda da sez e pudess chaschunar dapli donn. Uschia duai er vegnir garantida la segirezza per lura realisar l'auter onn las lavurs da sanaziun.
