A Brün en la Val Stussavgia preparan purs indigens dapi dudesch onns ina via da scarsolar sur il vitg. Dasperas mainan els l'ustaria «Schlittelbeiz». Qua vendan els spisas ord l'atgna producziun sco liongias, pulpas, chaschiel e pettas.
Er sche corona ha uss sminuì lur entradas e las sairas da fondue en l'intern da la «Schlittelbeiz» n'èn betg pli lubidas, èn ils purs cuntents co il manaschi marscha. E las visitadras ed ils visitaders giaudan il scarsolar davent da las fullas.