Dals 40,5 milliuns francs che vegnan duvrads per sanar la staziun da Versomi sto la vischnanca Val Stussavgia contribuir 1,6 milliuns francs. Ils 16 da zercladur da quest onn ha la radunanza communala da Val Stussavgia concedì quest credit cun gronda maioritad. La medema sera ha gì lieu ina infurmaziun da la Viafier Retica davart il project.
Plirs plazzals sin in areal
Lukas Züst, il president communal da Stussavgia ha declerà a las presentas ed als presents ch'igl access als perrons da viafier ed il perron actual na correspundian betg pli a las pretensiuns da segirezza. La staziun actuala na satisfetschia era betg pli a la lescha che pretenda in tractament egual da persunas cun impediments. Plinavant stoppian ins adattar ils trassés a la nova lunghezza dals trens ed al nov tact da mes'ura. Ulteriurs plazzals sin l'areal da la staziun sajan la fermada da l'auto da posta, il binari da chargiar blocs ed il binari mort. Tenor il president communal ston quels lieus vegnir adattads a las pretensiuns da segirezza.
La segirezza en il center
Il manader d'infrastructura da la Viafier Retica, Christian Florin ha infurmà ch'il project da sanar da la staziun da Versomi cuntegnia las medemas lavurs sco bleras autras staziuns da la Retica era. «En emprima lingia vai per la segirezza da las passagieras e dals passagiers», ha Florin ditg. A la staziun da Versomi manchian ils indrizs tecnics ch'ina viafier dovra oz ed in perrun. La staziun vegn manada oz cun in standard minimal. Fitg problematic per la Retica saja ch'ins na vegnia betg da satisfar a la lescha davart il tractament egual da persunas cun impediments. Christian Florin: «La staziun da Versomi è ina impurtanta staziun sin il tschancun da viafier en Surselva construì l'onn 1903. Oravant tut pussibilitescha questa staziun - ch'è era in dals lieus da cruschada - che nus pudain realisar en l'avegnir meglier il tact da mes'ura en Surselva.»
Trassés pli lads
Boris Gilgen, il manader da project da la renovaziun da la staziun da Versomi, ha ditg durant l'infurmaziun ch'ils binaris da viafier sin l'autezza da la staziun vegnian spustads envers il Rain Anteriur per ch'ins possia construir in perrun cun ina lunghezza da 230 meters per passagieras e passagiers. Il bajetg da la staziun vegn era renovà, ha Boris Gilgen ditg. E vinavant: «Nus quintain da pudair entschaiver cun las lavurs vid mez avust 2026. La fin da las lavurs è previda per la fin da l'onn 2028 u l'entschatta da 2029.» Ils dus represchentants da la Viafier Retica han era fatg da savair ch'ins vegnia durant las lavurs da construcziun a stuair interrumper il traffic da viafier per almain duas emnas l'avrigl 2027 e per tschintg emnas e mesa l'avrigl/matg 2028.