Siglir tar il cuntegn

Surselva Val Sumvitg: Perquai che la via è serrada ha la Axpo stuì reagir

Sin il tschancun dad Acla Mulin, curt avant il Bogn Tenigia, è la via interrutta. La sonda avantmezdi dals 11 da mars èn crappa e grippa sut la via glischnadas a val. Alura han las autoritads communalas serrà la via per il traffic e per peduns.

In grond donn
Legenda: In grond donn. RTR, Dominik Hardegger

Ils peduns pon dentant guntgir il problem, sco il president communal da Sumvitg Armin Candinas di. Els possian ir sur la punt pendenta. Questa via ston era ils collavuraturs da las Ovras electricas Rein anteriur/Axpo Power SA prender. Els ston far mintg’emna controllas a la tschiffada d’aua a Runcahez.

Sgular natiers in auto

Per ch’els possian far quellas han els plazzà in auto suenter la punt pendenta. Quel ha l’Axpo laschà sgular natiers cun helicopter, sco il manader da partiziun per bajetgs e mirs Luregn Caspescha ha ditg a RTR. Ils collavuraturs vegnan pia cun auto fin a la punt, van suravi e cuntinueschan lur viadi cun il segund auto.

La via interrutta
Legenda: La via interrutta. RTR, Dominik Hardegger

Axpo sclerescha sch'ella paja insatge

I n`è betg anc cler, quant ch’il donn vid la via custa. Ma la vischnanca da Sumvitg haja dumandà l’Axpo sch’ella paja ina part dal donn. L’Axpo stoppia sclerir sche quai vegnida en dumonda, di Luregn Caspescha.

Uss èn lavurers vidlonder da far liber il material sut la via. Suenter ston experts intercurir la geologia e decider, co vinavant. Armin Candinas quinta dentant che la via en Val Sumvitg vegnia puspè averta il zercladur.

RR actualitad 17:00