Siglir tar il cuntegn

Header

video
L'arrivada da Claire Zachanassian
Or da RTR dals 16.06.2015.
laschar ir. Durada: 5 minutas 9 Secundas.
cuntegn

Surselva Valendau survegn visita da la „veglia dama“

Valendau è enconuschenta per la preschentaziun da tocs classics da teater. Era quest onn e quai en il liber.

audio
Las sfidas da far teater en il liber a Valendau
ord RTR Audio dals 16.06.2015.
laschar ir. Durada: 3 minutas 26 Secundas.

Ord la plima da Friederich Dürenmatt (1921 - 1990) vegn il toc che vegn quest onn preschentà a Valendau. «Der Besuch der alten Dame» vegn preschentà da las gruppas da teater Valendau, Versomi e Stussavgia e quai a mez il vitg da Valendau en il liber. En tut en var 40 persunas sin tribuna. Cunquai ch’il toc vegn preschentà a mez il vitg ed ils 120 aspectaturs sesan per gronda part en via è il traffic ina sfida. Perquai ch’i ha danovamain ina via che pussibilitescha in sviament pon ins serrar la via per las producziuns. Igl è l’emprima giada ch’i vegn dà in toc da Dürenmatt a Valendau. Tenor il reschissur Arthur Bühler s’audia Dürenmatt en la carriera da mintga teatrist.

Il toc: Der Besuch der Alten Dame

En il toc vai per la milliardaria Claire Zachanassian che visita suenter blers onns puspè il vitg nua ch’ella ha passentà la giuventetgna. Entant ch’il vitg che prest bancrut spera da survegnir daners da Claire Zachanassian ha quella tut auters plans. Ella vul vendetga per in malfatg ch’è vegnì fatg envers ella. En ses giuvens onns è ella numnadamain vegnida en speranza da Alfred Ill mo lez aveva snegà quai. Uschia ha Claire Zachanassian stuì bandunar il vitg senza daners e chalzers e senza onur. Cun maridar in ritg um è ella vegnida tar ina immensa facultad. Per far vendetga empermetta ella 1 milliarda per la mort d’Alfred Ill.

Artitgels legids il pli savens