Siglir tar il cuntegn

Header

cuntegn

Surselva Veglia vischnanca burgaisa da Glion survegn raschun

La dretgira administrativa dal Grischun ha approvà il recurs da l’anteriura vischnanca burgaisa da Glion or da raschuns formalas, scriva la regenza grischuna. Sch’igl è insumma stà legal da transferì il possess da la vischnanca burgaisa, quella dumonda n’haja la dretgira dentant betg tractà.

La veglia vischnanca burgaisa da Glion aveva fundà curt avant la fusiun da la vischnanca Ilanz/Glion ina cooperativa burgaisa e transferì a quella tut sias proprietads, per ch’il possess na giaja betg a la nova vischnanca burgaisa Ilanz/Glion. Questa moda d’agir aveva la regenza scumandà. Sinaquai aveva la cooperativa burgaisa fatg recurs encunter il scumond da la regenza. In recurs che ha uss gì success.

Werner Degonda, il president da la vischnanca burgaisa da Ilanz/Glion.
Legenda: Werner Cavigelli, il president da la vischnanca burgaisa da Ilanz/Glion. RTR, C. Albin

Duas organisaziuns da burgais

Actualmain existan en la vischnanca Ilanz/Glion pia duas organisaziuns da burgais: la cooperativa burgaisa e la nova vischnanca burgaisa. Tranter ellas na dat i dentant betg gronds contacts, sco Werner Cavigelli, il president da la nova vischnanca burgaisa declera. La decisiun da la dretgira administrativa na pertutga era betg la lavur da la nova vischnanca burgaisa. Els hajan planisà da l’entschatta senza il possess da la veglia vischnanca burgaisa da Glion e quai restia vinavant uschia.

Co vinavant?

Thomas Kollegger, il manader da l’uffizi da vischnancas dal chantun Grischun, na sa anc betg sche la regenza vul far recurs encunter la decisiun da la dretgira administrativa. Fin ils 12 da december ha la regenza temp da sa decider.

Artitgels legids il pli savens