La suprastanza communala ha preschentà a la radunanza communala duas ideas per far pli attractiv il territori enturn il Mundaun per il divertiment. Sper ina via da scarsolar da Triel a Vella hai er dà l'idea d'in parc da raiver dasper l'ustaria da culm a Triel. En ina votaziun consultativa per mauns da l'Infra Mundaun è ina pitschna maioritad s'exprimida da persequitar vinavant be il parc da raiver. Ils custs approximativs muntan tranter 800'000 ed 1 milliun francs.
Da l'autra vart dal Mundaun saja la vischnanca Sursaissa Mundaun medemamain vid ponderar tge infrastructura da divertiment che pudess vegnir realisada, uschia il president communal da la Lumnezia Daniel Solèr.
Sanaziuns da pliras vias e lingias d'aua
Ultra da quai han ils Lumnezians approvà plirs credits per sanar las vias en vischnanca. Uschia vegn la via da guaud Punt Tgiern a Vrin sanada per 700'000 francs, la via da meglieraziun Catrutg a Vignogn vegn sanada per 180'000 francs. La radunanza communala ha plinavant deliberà il concept per la sanaziun da las vias da meglieraziun en Lumnezia per las votaziuns dals 15 da matg.
Plinavant ha la radunanza communala er approvà ils projects per lavurs da catram e remplazzament da las lingias d'aua en dus quartiers. Quels credits muntan a total 615'000 francs.