La vendita è en l’emprima auzada en ina gronda sala da sesidas. Dapertut maisas plain inventar da la cuschina. Tranter las maisas la glieud che sa schluita sin la tschertga dad in schnepli. Tuts vid discutar sch'i fa uss senn da cumprar quai u betg. Ed amez la sala, il possessur Beat Glaus.
Beat Glaus ha era schon vis ora pli cuntent.
I n'è betg simpel per l'um da 76 onns. Qusta bieraria era ses siemi, sia ovra da la vita. Ma el di sez, che vender tut è la meglra soluziun, uss sappia el giudair in zic la vita.
L'istorgia da la bieraria Surselva Bräu
2004 ha Beat Glaus entschet a bajegiar enturn la chasa en ina bieraria ed ustaria. Il 2005 è lura stada l’avertura. Fin 2017 è tut ì bain, ma curt avant ch’ir bancrut ha il possessur savì tener ils frains il davos mument. Il bierer ha bandunà la bieraria il matg e la producziun è vegnida suspendida. Per l’ustaria ha Glaus lura cumprà la biera d’ina bieraria en l’Appenzell. Ma igl era anc adina betg rentabel ed uschia han els serrà las portas da la bieraria e l’ustaria l'october 2017.
Vendita totala
Dapi il prim da settember 2019 fin ils 20 da settember, han ins la pussaivladad da cumprar l’inventar da l'ustaria. Mintgamai glindesdi fin mesemna da las 14:00 fin las 17:00 a Flem Casa d'uaul.
RR Total local 11:45