Il plan da Verner Soler n'è mai stà d'emigrar. Tuttina èsi daventà ord in mez onn America – ina via da varga trais decennis. Oz viva l'um da 56 onns cun sia famiglia a Los Angeles nua ch'el è Art Director tar ina gronda firma da marketing e reclama. Cun success creescha el istorgias e campagnas da reclama. In cuntrast relativ grond tar sia uffanza e giuventetgna a Vrin.
A Vrin Dado è el creschì si en ina famiglia da purs. En ses cudesch «Bandunar e mai schar dar» na vai dentant betg per ils cuntrasts tranter las duas differentas vitas, plitost èsi l'ir davent ch'ha insumma fatg veser el questa normalitad dal pitschen vitg e da la vita en il puresser. Entras returnar onn per onn ha el vis co ch'il temp è sa midà. Co era modas e manieras da lavurar sa midavan. La davosa giada cun ils ponns da fain, la davosa giada quest e l'auter. Muments che Verner Soler ha chapì da tener en salv. El ha fatg millis da fotografias e quai da situaziuns or dal mintgadi en chasa, sin il funs, en stallas e clavads. L'autenticitad e l'intimitad da questas fotografias laschan vesair in mund sincer ed autentic.
Il cudesch avra ina vista fitg persunala e quasi intima en la vita da bleras persunas, savens da sia famiglia. Sper las fotografias ha Verner Soler era descrit ils muments e quai per tudestg, englais e rumantsch.
Sche jau fiss stà a Vrin fiss tut quai stà normal e normal n'è betg insatge ch'ins vesa.