Avrir il pass en in'emna
Quests dis èn lavurers vid rumir la via sur il Pass dal Lucmagn. Els possian far mintga di var 300 meters, di Otti Flepp che maina la gruppa da segirtad. Dus exchavaturs ston prender surora la naiv per che la fresa possia insumma metter ora quella. La naiv saja per part 7 fin 8 meters auta. Sche quai na naiva ubain plova betg pli, quintian els da pudair avrir la via en in'emna, surtut era perquai ch’ils Tessinais gidan a far liber la via davent dal pass.
Tessinais hajan acceptà la situaziun
Naiv, vents e la plievgia hajan chaschunà ils gronds problems, di il president da la Pro Lucmagn, Martin Candinas. E la situaziun cun las bleras lavinas hajan els vulì mussar a la populaziun en la medias socialas. Perquai hajan era ils Tessinais gì chapientscha per la situaziun extraordinaria ch’il pass è stà serrà uschè blers dis.
Anc mai gì in accident
Insatge è cler, sco Martin Candinas punctuescha: Prioritad haja la segirtad. Il pass vegnia avert mo sche la via è segira, e cun questa devisa hajan els gì success. En l’istorgia da la Pro Lucmagn, ch'è vegnida fundada il 2000, hajan els anc mai gì in accident.
Prolungar galaria
L’enviern passà mussia dentant era ch’il chantun stoppia concretisar las investiziuns per la via sur il pass. Previs èsi da prolungar la galaria avant Sontga Maria per 300 meters en direcziun dal mir da fermada.
RR actualitad 12:00
