Siglir tar il cuntegn

Header

audio
Resultats tracking da vatgas mamma
Or da Actualitad dals 17.09.2021.
laschar ir. Durada: 3 minutas 38 Secundas.
cuntegn

Viandar pli segir Project da pilot «Alp-Tracker» finescha suenter dus onns

Suenter dus onns va il project da «Alp-Tracker» a fin. Sin las alps da Flem, Laax, Falera e Trin avevan vatgas mamma survegnì in cularin cun in «tracker». Quel emetta minga mes'ura in signal. Uschia èsi pussaivel da controllar nua che las muntaneras pasculeschan en il mument.

Niz turistic

Il signals vegnan ina giada a di tramess a la centrala e davent da là importads en la carta geografica da la destinaziun turistica. Turists pon lura decider sch'els vulan guntgir il territori u far insacura auter la tura per evitar conflicts cun las vatgas mamma.

Cun quella tecnologia savain nus mussar a noss giasts nua che las muntaneras pasculeschan il mument ed ils viandants san planisar lur rutas gia ordavant
Autur: André Gisler directur da turissem Flem Laax Falers
audio
Alptracker - nua en las vatgas-mamma?
ord Novitads dals 17.09.2021. Maletg: RTR
laschar ir. Durada: 3 minutas 39 Secundas.

Niz agricul

Ils possessurs da bestga e chauns da protecziun han la pussaivladad da persequitar ils moviments da lur muntaneras sin fundament dals signals ch’ils emetturs emettan. Tar la bestga funcziuna il sistem gia bain, perquai che quellas muntaneras sa movan mo plaun e sur pitschnas distanzas. Tar ils chauns da protecziun che curran grondas distanzas en curt temp è il niz anc dispitaivel.

Ils chauns da protecziun sa movan bler pli spert che quai ch’ils signals vegnan elavurads. Perquai è il chaun mai là nua ch’el vegn mussà sin la carta geografica
Autur: Jan Boner cussegliader al Plantahof

Sistem cun potenzial

Ils signals da GPS dals emetturs vegnan transportads sur la rait da func da la Swisscom. Quai ha procurà il davos onn per difficultads tecnicas ed uschia han ils responsabels stuì installar per quest onn a Cassons e sin il Grauberg duas ulteriuras antennas per avair sin l'entir perimeter d’alp la rait necessaria.

La tecnologia montada sin las alps avra anc ulteriuras pussaivladads da surveglianza per l'avegnir.

Il sistem sa mesirar tut quai che ha da far cun sensorica. Uschia savessan ins per exempel mesir quant plain ch’in bigl è, tge temperatura che regia en in lieu specific u schizunt sch’ina via è schelada u betg.
Autur: Stefan Aschwanden manader da la firma «Alptracker»

Per avair ina rait suffizienta per tut las alps dal Grischun duvrassi tenor Aschwanden bun 100 antennas supplementaras. Cun la montascha da quellas fissan quai custs da enturn 1 milliun francs.  

Il rapport final dal project «Alp-Tracker» vegn elavurà da l'Uffizi da construcziun bassa e duai vegnir publitgà pli tard.

audio
Per tadlar curt e cumpact
ord RTR Audio dals 17.09.2021.
laschar ir. Durada: 1 minuta 24 Secundas.

RTR novitads 06:00

Artitgels legids il pli savens