Bainprest esi puspè Pasca, la festa la pli impurtanta da la baselgia catolica. Durant la messa da Pasca dovra il plevon sco usità vin da messa per celebrar la sontga communiun. Betg mancar dastga perquai il vin da messa. Tge vin ch'astga vegnir duvrà per far messa è reglà cleramain en las leschas da la baselgia catolica.
Da la vit e senza substanzas estras
Tenor Martin Conrad da l’Institut liturgic da la Svizra tudestga sto il vin da messa esser producì cun ils fritgs da la vit, e na dastga betg cuntegnair substanzas estras sco per exempel zutger. Questas reglas èn strictas. Lubì sco alternativa tar il vin da messa è sulet il suc dad ivas. Era quel na dastga dentant betg cuntegnair substanzas estras. Ultra da quai dovri ina lubientscha speziala da l’uvestg per dastgar duvrar suc dad ivas enstagl da vin da messa.
Uvestg decida
La lubientscha da producir e da commerzialisar cun vin da messa dat l’uvestg. Savens han producents questa lubientscha gia dapi generaziuns, mo darar tschenta in nov viticultur la dumonda per dastgar producir vin da messa. Pli baud era quai era ina gronda onur d’astgar producir quest vin e vegniva celebrà cun ina gronda festa. Ozendi succeda quai be pli en furma scritta cun in attest da l’uvestgieu.
Preferenza per vin alv
Enfin il 15avel tschientaner vegniva duvrà vin cotschen sco vin da messa. Pir davent dal 16avel tschientaner vegn duvrà vin alv, e quai per raschuns praticas, sco Mario Albin da la Albin SA, ina fatschenta che fa commerzi cun vin da messa dapi ils onns otganta, ha ditg ad RTR. Vin cotschen na dettia betg tacs sch’el vegn spons, ed il vin alv, per il solit vin da dessert cun bler zutger, restia pli ditg frestg.
Consum da vin va enavos
Cunquai ch'i na dettia betg pli uschè bleras messas sco pli baud, sa reduceschia er il consum da vin da messa. Quai malgrà ch’era persunas privatas pon cumprar ozendi vin da messa. En tut venda Mario Albin per onn anc enturn 100 stgatlas à 12 buttiglias da mez liter en differentas plaivs. Quai èn circa 600 liters vin da messa.
