Nov president dal cussegl da vischnanca daventa Gérard Carigiet da Breil. El remplazza la presidenta partenta Mengia Risch da Vuorz. Sco nova vicepresidenta ha il parlament elegì Andrea Cathomas-Friberg da Dardin. Curdin Cadonau è vegnì reelegì sco actuar.
Nova ovra idraulica
En la seduta dal cussegl ha la suprastanza communala infurmà la legislativa davart il project ovra electrica cumbinada a Danis. Empè da siglir sin il Solar-Express da la confederaziun, saja la suprastanza communala sa decidida per la construcziun d’ina segunda ovra idraulica en cumbinaziun cun il reservuar a Danis, scriva la vischnanca en ina communicaziun. Tenor il rapport da controlla dal chantun sto il reservuar a Danis vegnir sanà proximamain. Damai ch’el n’è betg accessibel per ina sanaziun, ha la suprastanza communala incumbensà in biro d’inschigners da planisar l’ovra electrica a Casut e d’elavurar in project per ina segunda ovra electrica en cumbinaziun cun il reservuar a Danis. Per quest project po la vischnanca quintar cun sustegn finanzial dal chantun e da la Confederaziun.
Preventiv cun gudogn
Unanimamain ha il cussegl communal da Breil acceptà mardi saira il preventiv da la vischnanca per l’onn 2024. Il quint da gestiun prevesa ina svieuta da 15,9 milliuns francs tar in surpli d’entradas da bundant 800'000 francs. La vischnanca prevesa investiziuns da totalmain 5 milliuns francs, las investiziuns nettas èn calculadas cun 4,54 milliuns francs.