Dumengia, ils 8 da mars, ha il suveran da Mustér acceptà la realisaziun d’in nov parc da gieus e moviment cun center d’acrobatica sin l'areal dal Center Fontauna. Cun 596 Gea cunter 322 vuschs Na ha el concedì il dretg da bajegiar la halla a las Pendicularas Mustér SA ed, il medem mument relaschà a lezzas in daivet dad 1,75 milliuns francs.
Cunter questa votaziun ha il convischin Stefan M. Seydel inoltrà in recurs concernent il dretg da vuschar a la Dretgira superiura dal chantun Grischun. Succedì è quai ils 9 da favrer, ladinamein suenter ch’il messadi è stà public.
Maschaida da decisiuns
En sia argumentaziun a la Dretgira superiura dal chantun Grischun scriva Stefan M. Seydel: «Il project da votaziun cuntrafa als principis fundamentals da l’unitad da la materia. Quels pretendan ch’il project da votaziun ha in connex unit ed objectiv. El na dastga betg vegnir cumbinà cun fatgs esters.»
Il project da votaziun cuntrafa als principis fundamentals da l’unitad da la materia.
Tenor Stefan M. Seydel maschaida il project da votaziun differentas decisiuns: il relasch d’in emprest da la vischnanca en l’autezza dad 1,75 milliuns francs, il conclus d’in dretg da bajegiar sin l'areal Center Fontauna ed il project concret d’ina part da gieus e moviment cun center d’acrobatica. Medemamain contesta ses recurs dumondas avertas pertutgant il manaschi, sco era la responsabladad finanziala d’in indriz da sport, manà u incorporà en in’infrastructura da la vischnanca. En quai connex numna Stefan M. Seydel ils custs, il mantegniment, in eventual deficit u ina cumpetenza per quest manaschi.
Be pudì dir Gea u Na
En ses recurs a la Dretgira superiura dal chantun Grischun constatescha Stefan M. Seydel che las differentas parts dal project stettian da principi en differentas cumpetenzas da decisiun. Quellas stoppian vegnir giuditgadas tant dal dretg sco da la vart politica: «Enten resumar tut quellas decisiuns en ina suletta dumonda cun Gea u Na, saja il votant vegnì sfurzà d’acceptar u renviar differents interess. Quatras vegnia l'opiniun libra dal votant engrevgiada.» Per questa raschun constatescha Stefan M. Seydel che la furmaziun da la materia è violada e che la votaziun dals 8 da mars sto vegnir abolida.
Seydel: «Jau na sun betg cunter la halla»
Sco Stefan M. Seydel ha ditg sin dumonda da la FMR, na saja el betg cunter la halla: «I na va betg per lezza, mabain cunter la maschaida da decisiuns. Medemamain èsi da far in segn da dumonda davart il relasch dal daivet.
Sper il dretg da bajegiar ha il suveran gì da decider, schebain ils daners da quai daivet duain vegnir impundids autramain.» In milliun da quai daivet dad 1,75 milliuns francs duai cular sco contribuziun a fonds perdu en la halla, tschels 750'000 francs sco cumpart per la Golden Card. En dumonda tschenta Stefan M. Seydel er il maletg sin il frontispizi dal messadi da votaziun: «Tge ha ina foto d’ina ruschnera da far cun quest project?»
Vischnanca ha prendì posiziun
La Dretgira superiura dal chantun Grischun ha dà la chaschun a la vischnanca da Mustér da prender posiziun sin il recurs da Stefan M. Seydel. Sco il mainafatschenta da la vischnanca Roland Cajacob ha ditg a la FMR, è la votaziun stada correcta uschia: «El contract da bajegiar èsi stipulà che la vischnanca relaschia il daivet dad 1,75 milliuns francs. Consequentamain na pudain nus betg sparter quellas duas fatschentas.»
Suenter ch’il recurs saja vegnì inoltrà e la vischnanca haja survegnì la chaschun da s’exprimer, saja l'agir vegnì sclerì giuridicamain: «Ils giurists èn cleramain da l'opiniun che la votaziun saja correcta uschia.» Sch’il relasch dal daivet na fiss betg stà stipulà en il contract per il dretg da bajegiar, fiss l’approvaziun dal dretg da bajegiar stada en cumpetenza dal cussegl da vischnanca. «Nus essan persvadids da la votaziun. Consequentamain vegnin nus er a cuntinuar cun la fatschenta», di Roland Cajacob. Il recurs n'ha gì nagin effect suspensiv, vul dir ch’el avess pudì impedir la votaziun.
