Siglir tar il cuntegn

Header

cuntegn

Vischnanca Glion En l’avegnir pon uniuns da sport quintar cun sustegn

Il parlament da la vischnanca da Glion ha approvà la nova lescha che duai promover la sanadad, la prevenziun ed il sport. Uschia pon tut las uniuns da sport en l’avegnir dumandar la vischnanca per sustegn. Fin uss n’èra quai betg reglà, tgi che po quintar cun sustegn.

La vischnanca da Glion è ina gronda vischnanca cun pliras uniuns sportivas. Quellas pon en l’avegnir inoltrar dumondas per sustegn – tant dal sport da giuventetgna sco era per infrastructura. Fin uss aveva la vischnanca da Glion surpiglià suenter la fusiun las isanzas da las vischnancas veglias. Inoltrar dumondas per sustegn hajan mo fatg quellas uniuns, che survegnivan gia daditg sustegn. Cun la lescha nova possian ins stgaffir reglas cleras per tuts.

audio
Per tadlar: Curt e cumpact
ord RTR Audio dals 07.04.2022.
laschar ir. Durada: 1 minuta 7 Secundas.

La lescha nova era l’emprima lescha approvada dal nov parlament da Glion, ch’è sa constituì l’entschatta da quest onn. Era en la lescha nova è vegnì integrà la prevenziun e la sanadad. Quai fetschia senn, perquai che sanadad e sport saja collià stretg. Per pudair far las lavurs ha la suprastanza elegì ina cumissiun per la legislatura actuala.

Abolì leschas dal forestalesser

Plinavant ha il parlament approvà da schliar pliras leschas che na faschevan betg pli senn. Surtut en il forestalesser eran pliras leschas betg pli vertentas. La vischnanca haja reglà sur l’entir intschess communal las dumondas dal guaud. Perquai na sajan las leschas betg pli necessarias, uschia l’argument da la suprastanza.

Ulteriuras leschas vegnan surlavuradas

Il proxim temp ha la vischnanca da Glion anc pliras leschas veglias ch'ella vuless abolir: uschia per exempel en dumondas da parcar, ni era tar la lescha da construcziun. Sco la presidenta communala Carmelia Maissen ha ditg, saja la finamira da surlavurar tut questas leschas.

Era la lescha da pumpiers è vegnida revedida unanimamain. Uschia è vegnida reglada da nov la situaziun da pèrs che vivan en il concubinat. Talas persunas pon, suenter ch’els vivan tschintg onns ensemen, dumandar ch’ina persuna vegn dispensada da l’obligaziun da prestar servetsch per ils pumpiers.

RTR novitads 06:00

Artitgels legids il pli savens