Il parlament communal da Glion ha surdà a la suprastanza l’incumbensa d’elavurar in catalog da mesiras concretas per commerzialisar la vischnanca ed augmentar l’attractivitad. Las mesiras èn planisadas per ils proxims tschintg onns. Quai scriva l’administraziun communala en ina communicaziun.
Plinavant ha il parlament refusà il credit supplementar per illuminar ils centers dals vitgs cun LED. En il concept d’illuminaziun cun LED ch’il parlament communal ha concedì l’avrigl 2021 era previs il medem tip da glisch per l’entir territori communal auter che la citad veglia da Glion. Tar la reslisaziun en las emprimas fracziuns è crudà en egl che quel tip disturba il maletg en ils centers istorics dals vitgs. Per mantegnair il maletg dal vitg en las fracziuns fiss stà necessari in ulteriur credit da 115’000 francs.