Pretensiuns per l'avegnir
- Realisescha lescha da bajegiar senza opiniuns persunalas
- Surpiglia responsabladad, ed agescha lasuenter
- Involva cussegliaders ed auters uffizis mo en cas urgents
- Betg simplamain acceptar decisiuns e propostas da cussegliaders ed auters uffizis, mabain s’engaschar per la populaziun
- Critica envers architectura è da tralaschar e da prender decisiuns objectivas tenor la lescha.
La petiziun che Claudio Cadruvi, impressari da Glion, ha lantschà mussa la malcuntentientscha da la populaziun da Glion envers l'uffizi da bajegiar. La lescha da bajegiar vegnia interpretada tenor opiniuns persunals, fa el valair en la petiziun. Quella fa er propostas concretas co gidar la populaziun. Quai cun l'idea da crear ina glista da duairs ed in prediscurs per persunas che vulan bajegiar.
In uffizi che fa tema
Rimnar suttascripziuns saja ì fitg bain, di Claudio Cadruvi quai malgrà che bain inqualin haja gì retegnientschas da suttascriver.
Sche nus essan en la vischnanca da Glion uschè lunsch ch'ins ha tema da vegnir schicanà, sch'ins suttascriva ina tala petiziun, lura èsi trist.
Tge che saja er deplorabel, saja che bleras persunas hajan ditg, ch'i na possian betg suttascriver questa petiziun, perquai ch'i hajan sez affars e na veglian betg ristgar da betg pli survegnir lavur, uschia Claudio Cadruvi vinavant. Persunas hajan er ditg ch'i hajan dumondas pendentas tar l'uffizi da construcziun e na veglian betg periclitar quellas.
Carmelia Maissen, la presidenta da la vischnanca da Glion, ha ditg envers RTR ch'ella prendia posiziun en chaussa, denton pir suenter la surdada da la petiziun.