Renzo Blumenthal era sco suprastant durant in onn e mez schef dal Departament communal per fatgs da bajegiar en la Lumnezia. Il settember ha el sco pur e persuna privata disfatg ina muschna tar in funs ch’el ha prendì a fit da la Fundaziun ecclesiastica Pervenda Pleif sut il vitg da Vella. Quai ha chaschunà dumondas e discussiuns.
Ina annunzia n'hai jau betg fatg. Cunquai che la muschna era uschè pitschna, sun jau ì da quai anora ch’i na dovria betg ina lubientscha.
Persunas che han vis el a chavar enturn il terren cun in Menzi Muck, hajan dumandà sin vischnanca sch’el haja ina lubientscha, di il president communal, Daniel Solèr. Il cas saja vegnì intercurì. Er Renzo Blumenthal sez di ch'el n'haja betg gì ina lubientscha da far las lavurs.
Quella situaziun haja agità la vischnanca e ses organs, di Daniel Solèr. Renzo Blumenthal n'haja dentant betg demissiunà sco suprastant pervi da quella muschna. Ils motivs sajan persunals, conferman tant il president sco er Renzo Blumenthal.
Quella muschna ha il mument in status bunamain prominent. I vegn discutà fitg tar nus, entaifer la Lumnezia sco era ordaifer.
La muschna na fatschenta uss betg mo la Cumissiun da bajegiar da la Lumnezia, mabain er ils uffizis a Cuira. Quels ston giuditgar la chaussa, perquai che midadas da terren dovran per regla ina lubientscha da bajegiar chantunala per objects ordaifer las zonas da bajegiar. La muschna giascha en ina zona per la protecziun da la cuntrada, quai n'ha dentant nagina influenza sin ina eventuala lubientscha. Quella zona scumonda sulet da construir novs bajetgs en la vischinanza da la baselgia parochiala da Vella. Sco Daniel Solèr ha ditg, vegnia il proxim temp a dar sesidas ed ina examinaziun visuala al lieu per pudair giuditgar co vinavant. I na po betg vegnir sclaus che la muschna stoppia vegnir reconstruida.
