Siglir tar il cuntegn

Header

Navigaziun

cuntegn

Visit Vals SA Stefan Schmid è nov directur da turissem

Da nov è il president da vischnanca er anc il directur da la nova Visit Vals SA. L'organisaziun turistica è vegnida fundada la sonda passada. El è vegnì elegì d'in gremi da l'uniun schliada Visit Vals e dals commembers da la suprastanza da la Sportbahnen Vals SA.

Stefan Schmid
Legenda: RTR

La nova Visit Vals SA unescha las pendicularas, las lavurs da turissem d'enfin uss e la cumissiun da marketing locala. Da trais uniuns turisticas datti uss pia ina suletta, responsabla per las acziuns per giasts, l'infurmaziun, il marketing, l'infrastructura e la gastronomia en il territori da skis.

Forzas novas e veglias

Per realisar en l'avegnir ils plans po Schmid quintar cun forzas veglias: Janine Westenberger è manadra da gestiun dal turissem e vegn da nov manadra dal sectur da l'infurmaziun ed events. Maurus Tomaschett, il directur da las pendicularas vegn da nov manader da sectur da las pendicularas.

Presidenta dal cussegl d'administraziun da la nova Visit Vals SA è da nov Artemis Truffer, la feglia da Pius Truffer. Cumplet nova n'è la fatscha dentant betg per Truffer. Avant dus onns è ella vegnida elegida en il cussegl d'administraziun da las pendicularas.

RR novitads 11:00