Siglir tar il cuntegn
cuntegn

Surselva «Visit Vals»: Trais organisaziuns sut in tetg

Las pendicularas da Val Son Pieder, la scola da skis ed il marketing furman en l'avegnir la nova societad «Visit Vals SA».

Plazza cadruvi da Val son Pieder
Legenda: Val son Pieder vul novas structuras turisticas per ils giasts. Keystone

Val Son Pieder vul concentrar las forzas en l'organisaziun dal turissem. Sco quai che la vischnanca communitgescha èsi previs dad unir las organisaziuns da las pendicularas da Val Son Pieder, cun quellas da «Visit Vals» che cumpiglia il biro da turissem e las scola da skis e quellas da «Marketing Vals» che cumpiglia la reclama ed il marketing. Unids vegnan ils servetschs en ina nova societad – la «Visit Vals SA».

Vischnanca sa participescha considerablamain

La vischnanca duai era esser participada marcantamain a la societad, sco quai ch'ella è gia participada a las pendicularas. Quai tenor la proposta ch'ina gruppa da lavur ha preschentà sonda a Vals. Tschertas prestaziuns da la nova societad duai la vischnanca finanziar sin basa d'ina cunvegna da prestaziun cun la nova societad. La societad saja averta per investurs – interessents possian cumprar aczias.

Finamiras strategicas anc en discussiun

La nova societad vegn tranter auter ad esser responsabla per l'infurmaziun dals giasts, la reclama e surtut per il manaschi dal territori da skis. Las novas structuras duain vegnir introducidas fin la mità da l'onn – il medem temp da la realisaziun dal concept da finanziaziun che radunanza communala e votaziun a l'urna avevan approvà la fin da l'onn passà.

RTR Novitads 06:00