La nova stizun dal Volg a Vella è cun ina surfatscha da ferm 200 meters quadrats pli gronda che la veglia. Quella aveva strusch 170 meters quadrats. Pervi da quest engrondiment vegn la stizun dal Volg a Vella taxada da Volg en ina classa pli auta e survegn uschia dapli products. Bunamain 3'000 products san ins cumprar en questa stizun.
Architect da renum
La stizun nova è vegnida planisada da l'architect Gion Antoni Caminada. Ella è tegnida tut en lain, quai che dat ina tempra in pau speziala a questa stizun. Bajegià la chasa cun stizun e pratica da medi ha la vischnanca Lumnezia.
La cooperativa ViVal Lumnezia ha affittà questa localitad e maina là il negozi dal Volg. La ViVal Lumnezia maina era ils negozis a Cumbel ed a Morissen. Plinavant ha la ViVal Lumnezia in'atgna pasternaria a Vella, che furnescha tut ils products da pasternaria a quests negozis.
Rolla impurtanta da la vischnanca
L’idea da bajegiar stizun e pratica da medi en ina chasa è vegnida, perquai che la Lumnezia ha stuì ponderar co mantegnair questas purschidas. Duri Blumenthal, il president da la vischnanca Lumnezia, ha menziunà che far nagut muntia a lunga vista che la glieud bandunia la val. Franar quai digren veglia dir investir en l'avegnir.
RR actualitad 17:00