Ussa din ils geniturs dals scolarets che quai na fetschia betg senn. Els veglian che la scoletta restia a Vella. Uschia han els inoltrà ina petiziun che pretenda da dar maun liber al cussegl da scola da decider sur dal lieu da scola, e quai en favur dals uffants.
Contract da fusiun
Fin ussa era il cussegl da scola lià vi dal contract da fusiun da la Lumnezia che garantiva ina scola entadim la va. Quai vegniss schlià cun la petiziun.
Petiziun
Daco reageschan il geniturs uschia e desistan sin il return da la scoletta a Lumbrein? Ad interim ha la vischnanca da Lumnezia numnadamain communitgà che la scola primara da Vrin/Lumbrein vegnia serrada e che tut ils scolars giajan davent da l'onn da scola 2016-2017 a scola a Vella e Cuschnaus. I n'haja simplamain betg avunda scolars. Ed en quest cas dastgiaa la vischnanca serrar quella scola entadim la val.
Alexander Casanova, in dals geniturs che ha inoltrà questa petiziun, manegia che la serrada da la scola primara a Vrin/Lumbrein haja manà els a la conclusiun ch'i na fetschia nagin senn da salvar mo la scoletta a Lumbrein. La decisiun da far questa petiziun saja in decisiun per ils uffants, manegia Casanova.
En cas d’in gea
En cas che la populaziun lumneziana di gea a quella petiziun, munta quai che scola da la Lumnezia vegn manada en ils dus centers da scola a Vella e Cuschnaus.
Plinavant vul in gie dir ch'i na dat suenter naginas restricziuns pli davart l'organisaziun dal manaschi da scola. Tenor l'artitgel 63 da la constituziun da la vischnanca da Lumnezia è la direcziun e surveglianza da la scola chaussa dal cussegl da scola. Sur da quella petiziun votescha la Lumnezia ils 28 da favrer.