Siglir tar il cuntegn

Header

Teilrevision Orsplanung Gemeinde Flims
Legenda: Revisiun parziala da la planisaziun pervia da las novas sendas per velos da muntogna. Vischnanca Flem
cuntegn

Votaziuns a Flem Novas sendas da velos sco consequenza dal FlemXpress

Tgi che di A sto era dir B. U tuttina buc? Il FlemXpress, la nova pendiculara, ha il december passà transportà ils emprims osps da Flem en il territori da skis. Per schlargiar la purschida da stad vul la vischnanca construir duas novas sendas per velos da muntogna.

Cun il nov FlemXpress duessia dar en l'avegnir duas novas sendas per velos da muntogna. Ina senda giess davent da la staziun da Startgels giu Foppa e tschella da Foppa giu Flem. En tut èn las duas sendas radund 8 kilometer lungas e prevesidas fissan ellas per principiants e famiglias.

Cunquai ch'il trassé va per part tras il guaud e per part sur pastgiras, sto la vischnanca midar il plan da zonas. Avant ch'insumma pudair inoltrar ina dumonda da bajegiar ordaifer las zonas da construcziun, dovria questa midada, uschia Jürg Caprez, ils suprastant communal da Flem e president da la cumissiun da planisaziun. E tar la revisiun parziala da la planisaziun han las votantas e votants il davos pled.

Mountainbike-Trail in der Weissen Argen
Legenda: Si en las muntognas ed en ils guauds sur Laax e Flem hai numerus sendas, uschenumnads «trails», per vegnir a val cun il velos da muntogna. Arena Alva

Il project na saja betg dispitaivel tar la populaziun, uschia Jürg Caprez. Era durant l'exposiziun da cooperaziun n'haja la glieud betg dà blers resuns. Ina vallada sitga nua ch'ils animals selvadis tschertgan protecziun haja procurà per dumondas dals chatschaders. Ins haja guardà cun ils organs da surveglianza da chatscha sche quai saja giustifitgabel.

audio
Revisiun parziala per pistas da mountainbike
ord Actualitad dals 20.02.2024. Maletg: Arena Alva
laschar ir. Durada: 3 minutas 4 Secundas.

La vischnanca da Flem quinta fermamain cun il consentiment dal suveran. Lez aveva avant 5 onns detg Gea a l'urna davart la finanziaziun da 20 milliuns francs per construir il «FlemXpress». El aveva uschia contribuì in quart da la summa totala da construcziun. In proxim pass fiss da meglierar la purschida per il turissem da stad

Sch'il suveran schess Na, alura stuess la vischnanca smetter ses plans e guardar vinavant co ella vul promover ses plan strategic per il svilup dal traffic plaun.

RTR actualitad 12:00

Artitgels legids il pli savens