La dumonda, cun tgi fusiunar – cun Breil u cun Glion – è ina dumonda che parta la vischnanca da Vuorz en duas gruppas gulivas. Quai ha gia il resultat d'avant 4 mais mussà, cura che la populaziun da Vuorz ha decidì cun 105:104 vuschs d'elavurar in contract da fusiun cun Breil. Quai cunter la proposta da la suprastanza communala che vuleva ina fusiun cun Glion.
Era venderdi saira a la radunanza communala, nua ch'i gieva per eleger la suprastanza communala per la perioda d'uffizi 2017-2019 è questa spartiziun stada vesaivla. En l’emprim scrutini han nagins dals candidatas cuntanschì il pli absolut.
En il segund scrutini, nua ch'il pli relativ vala, han il president actual Guido Dietrich ed il candidat Heini Hunger cuntanschì omadus 53 vuschs. Tenor la lescha ha en quai mument la sort gì da decider. E lezza ha decidì en favur da Guido Dietrich.
3 novs commembers en suprastanza
Enstagl da daventar il nov president communal è Heini Hunger vegnì elegì en la suprastanza communala. Insumma hai dà 3 novs commembers en la suprastanza, che sa cumpona en tut da 5 persunas. La cussegliera e vicepresidenta Annalisa Halter aveva gia ditg ordavant ch'ella na candideschia betg pli.
Sper il president actual Guido Dietrich è dentant mo in cusseglier communal vegnì reelegì, Sven Seeli. Ils dus cussegliers Anton Seeli e Fluri Pfister n’èn betg vegnids reelegids malgrà ch'els stevan a disposiziun per ina ulteriura perioda d'uffizi. Ina midada che ha tenor Guido Dietrich da far cun il tema fusiun.
La maioritad da la suprastanza veglia è per ina fusiun cun Glion... Ed ussa devi halt glieud che vuleva en suprastanza da quels ch’èn per Breil.
Sper Heini Hunger èn vegnids elegids da nov en la suprastanza communala Robert Veraguth e Mengia Risch.
RR actualitad bunura 06:00
