Donn a la cuntrada e dapli traffic
Ils adversaris dad ina via tras Migliè fan valair che quella faschess donn a la cuntrada. Plinavant chaschunass ella dapli traffic tras il vitg da Vuorz, e là saja quai gia oz fitg stretg. E la finala stuess ins quintar cun situaziuns privlusas surtut per ils uffants, persunas pli passadas e turists. Perquai èn els encunter la fusiun da Breil, Vuorz ed Andiast.
Via purtass avantatgs per purs, privats e turists
Ils adherents da la fusiun dian che la via saja ina part dal project da fusiun. Ina fusiun purtass blers avantatgs per l’economia e per il viver insumma, ha in giuven ditg. Ina via tras Migliè haja era avantatgs per ils purs, ils privats ed ils turists. Ins bajegiass ina via che exista gia per 80%, ed uschè na faschess quella talmain empaglia la natira.
5. 1 milliuns francs per la via tras Migliè
En il contract da fusiun èsi fixà in credit da 5.1 milliuns francs per la via da Vuorz a Breil. Ils 24 da zercladur decidan Vuorz ed Andiast a la radunanza communala sur da questa fusiun, ils 25 da zercladur decida Breil a la votaziun a l’urna. E sch’il Cussegl grond accepta alura la fusiun po quella entrar en vigur il 1. da schaner 2018.