Siglir tar il cuntegn

Header

Apunta, quel hotel.
Legenda: Il «Grand Hotel» dal «Waldhaus Flims Alpine Grand Hotel & Spa». cdm
cuntegn

Surselva Waldhaus a Flem – avert suenter 4 mais e 40 milliuns

Suenter in temp da renovaziun da quatter mais ha l’hotel da tschintg stailas, che sa numna uss «Waldhaus Flims Alpine Grand Hotel&Spa», avert sias portas. Quai scriva l’agentura da novitads svizra sda tenor ina communicaziun da l’hotel.

Tut las 142 suitas e chombras èn vegnidas renovadas cumplettamain. Ellas sa chattan en il Grand Hotel, la Villa Silvana ed il Chalet Belmont. Quatter restaurants, in Spa da 2’800 meters quadrats ed il pli grond parc d’hotel en Svizra tutgan medemamain tar la chasa da luxus.

Tenor il directur da l’hotel, Peter Schoch, procuran 180 collavuraturas e collavuraturs per il bainstar dals giasts. Il cumplex d’hotel tutga dapi in onn a la societad americana Z Capital Partners.

Ina part da las investiziuns da 40 milliuns èn vegnidas finanziadas cun la vendita dad in’ovra d’art unica or dal possess da l’hotel. I sa tracta dal tripticon «Panorama da Flem» da l’artist Giovanni Giacometti. In collecziunader svizzer aveva cumprà l’ovra la stad passada per 4,05 milliuns francs.

RR novitads 15:00