Zai banduna Mustér

Tenor in artitgel dal Bündner Tagblatt ha il cussegl d'administraziun decidì da serrar la manufactura a Mustér. Sis persunas perdan la plazza, tranter auter er l'inventader dal ski Zai, Simon Jacomet.

Laschar ir video «La marca da skis Zai banduna Mustér»

La marca da skis Zai banduna Mustér

1:20 min, Telesguard dals 9.10.2017

Sco Simon Jacomet ha laschà savair na saja el betg stà involvì en quella decisiun da relaschar il persunal e serrar la manufactura Zai a Mustér.

Co i duai ir vinavant n'è betg cler. A tut il persunal è vegnì scumandà da discurrer cun las medias. Sco il Bündner Tagblatt rapporta, na sa nagin nua che la producziun da skis duess ir vinavant. Cler è sulettamain, che la marca Zai duai exister vinavant. «Dapi la decisiun da serrar sajan pliras autras portas s’avertas» vegn il CEO Benedikt Germanier cità. Per RTR n'è el betg stà cuntanschibel.

L'inventader Simon Jacomet (san.) ed il CEO Benedikt Germanier l'onn 2014 en la manufactura a Mustér. Avrir maletg en lightbox.

Legenda da maletgs: L'inventader Simon Jacomet (san.) ed il CEO Benedikt Germanier l'onn 2014 en la manufactura a Mustér. RTR, G. Hosang

La Firma Zai datti dapi 15 onns. RTR ha adina puspè rapportà sur da questa manufactura che producescha skis d’auta qualitad. Ils skis da Zai custan tranter CHF 3’300.- e CHF 9’800.-. Dapi intgin temp producescha Zai era in putter, in bastun da golf. Tenor Benedikt Germanier vegnia la marca Zai dentant dals skis e quai duai era restar uschia.


Ord l'archiv

RTR actualitad 12:00