A Berna è il Swiss Press Award vegnì surdà, in dals pli impurtants premis da schurnalissem en Svizra. En la categoria video è la seria dad RTR: Mission Pee Wee da noss redacturs Curdin Fliri e Patrick Capaul vegnida sin il terz plaz.
Gudagnà en quella categoria ha il video da SRF impact investigativ: «Likes mit Leid – Wie ein Kanal von Gewalt und Erniedrigung profitiert», realisà da Fabian Kohler e Kilian Küttel.
L'entira istorgia da «Mission Pee Wee»
Il turnier Pee Wee en il Canada è il pli renumnà turnier da hockey per giuvens talents. Ils dus redacturs dad RTR han svelt sentì la gronda impurtanza da quest turnier.
Betg mintgin che ha giugà al Pee Wee vegn in star. Ma mintga star da la NHL ha giugà al Pee Wee.
Betg be ils giuvens talents èn fieu e flomma per il hockey, era lur famiglias partan lur passiun. Lur vitas èn deditgadas al hockey, il sport dictescha l'agenda da la famiglia. E quai tut per ch'ils uffants pon viver il siemi da daventar in di profi da hockey. Ils dus redacturs dad RTR han accumpagnà la qualificaziun, il viadi a Québec, ils muments da legria dentant era ils muments trists dal turnier.
Jau hai trasora pensà: Quels uffants n'emblidan mai pli quest turnier, quai resta per adina.
Che lur seria è nominada per il «Swiss Press Award», saja ina onur ed era ina reconuschientscha per la lavur prestada, uschia ils dus redacturs.