La regenza ha approvà las revisiuns parzialas da la planisaziun locala che la vischnanca da Tavau aveva concludì. Quai scriva il chantun. D'ina vart vai per revalitar la zona da recreaziun enturn il Lai da Tavau e da l'autra vart per adattar l'explotaziun da glera e per engrondir la deponia en il territori «Tola».
Per las visitadras ed ils visitaders dal Lai da Tavau duain vegnir purschidas meglras pussaivladads da vesair e sentir l'aua, ed en general duai vegnir augmentada l'attractivitad dal lai e da sia cuntrada. Per quest intent èn tranter auter previsas ina plattafurma panoramica en il territori «Seehornwald» ed ina nova senda da viandar tranter l'hotel «Stilli Park» e la Stillistrasse.
Engrondir la deponia Tola
Sin ina terrassa da glera en il territori «Tola», ch'è situà al sidost dal vitg Wiesen, vegni explotà glera e sablun dapi ils onns 1960. Retschertgas han mussà ch'igl è necessari d'adattar il concept d'explotaziun cun engrondir il perimeter d'explotaziun per var 5’000 meters quadrats.
Plinavant duai star a disposiziun en quest territori ina deponia cun in volumen pli grond pussaivel per la dismessa regiunala. Cun engrondir la deponia «Tola» po il basegn da deponer material da la vischnanca da Tavau vegnir cuvrì previsiblamain fin l'onn 2056.