Siglir tar il cuntegn

Header

cuntegn

Tavau Collisiun frontala cun bus local

La dumengia en damaun è succedì en il sectur da la storta da Stützbach a Tavau Wolfgang ina collisiun frontala tranter in auto da persunas ed in bus da lingia, scriva la Polizia chantunala. Sis persunas èn vegnidas blessadas en quest connex ed han stuì vegnir ospitalisadas. Durant radund quatter uras è la via stada serrada per tut il traffic.

In manischunz è charrà, ensemen cun trais accumpagnaders, en l’auto da persunas da Tavau en direcziun da Claustra. Sin l’autezza da la storta da Stützbach è il vehichel vegnì sin il vial oppost en ina storta dretga che croda fermamain. Ils motivs n’èn anc betg sclerids dal tuttafatg. Il medem mument sa chattava il bus da lingia local sin il viadi en direcziun Tavau. Entaifer la storta èn ils vehichels collidads frontalmain sin la via cuverta cun naiv.

Davos-Wolfgang: Frontalkollision mit Linienbus fordert sechs verletzte Personen. Drei davon wurden schwer verletzt.
Legenda: Entaifer la storta èn ils vehichels collidads frontalmain sin la via cuverta cun naiv. Polizia chantunala dal Grischun

Entras la carambolascha vehementa èn ils quatter passagiers da l'auto, il chauffeur da dal bus ed in passagier sa blessads. Las persunas blessadas èn vegnidas provedidas cun agid d'urgenza al lieu tras quatter squadras d’ambulanza. Pervi da la greva blessura è in passagier da l'auto vegnì sgulà tras la Rega a Cuira en l’Ospital chantunal dal Grischun. Dus ulteriurs passagiers d’auto èn vegnids transferids cun ambulanza en l’ospital da Schiers e Cuira. Las trais persunas ch’èn sa blessadas levamain èn vegnidas transportadas a l’ospital da Tavau.

Vi dad omadus vehichels hai dà in donn da material considerabel e quels han stuì vegnir runads davent. Durant l’eveniment ha il traffic stuì vegnir serrà en omaduas direcziuns per radund quatter uras. Recumandaziuns da sviar èn vegnidas fatgas. Sper collavuraturs da la Polizia chantunala e da l’Uffizi da construcziun bassa dal Grischun èn stads en acziun 13 pumpiers dals pumpiers da Tavau, tranter auter spezialists da la guardia d’ieli, in team da la Rega sco era mintgamai dus teams dal salvament da Tavau e Schiers. La Polizia chantunala dal Grischun examinescha l'accident.

audio
Per tadlar: las novitads da las 17:30
ord RTR Audio dals 11.02.2024.
laschar ir. Durada: 38 Secundas.

RTR novitads 17:00;

Artitgels legids il pli savens