Siglir tar il cuntegn

Header

Centre Suisse d'Electronique et de Microtechnique SA
Legenda: CSEM SA
cuntegn

Tavau e Landquart Sustegn per duas instituziuns da perscrutaziun

La regenza grischuna conceda ina summa da 7,4 milliuns francs al Center svizzer d'electronica e da microtecnologia (CSEM SA), e ses project regiunal a Landquart per ils onns 2024 fin 2027. Per il project èn previs custs totals imputabels da previsiblamain 19,4 milliuns francs. Ultra da quai vegn concedida ina contribuziun da 600'000 francs en il rom da la Nova politica regiunala da la Confederaziun (NRP). Las contribuziuns NRP van mintgamai per la mesadad sin donn e cust da la Confederaziun e dal chantun.

Tge fa la CSEM SA?

Avrir la box Serrar la box

La CSEM SA è in center da perscrutaziun e da svilup svizzer cun il focus sin nanotecnologia e microtecnologia. Ella renda accessiblas novas tecnologias a l'industria ed ella gida a las interpresas da rinforzar lur cumpetitivitad cun agid da products, da process e da servetschs innovativs. La CSEM SA è represchentada en l'entira Svizra cun var 570 collavuraturas e collavuraturs en sis lieus (Neuchâtel, Turitg, Berna, Alpnach, Allschwil e Landquart). Cun tut sias tecnologias sustegna ella interpresas pitschnas e mesaunas sco er manaschis industrials al lieu. Il center regiunal CSEM Landquart è spezialisà sin ils secturs «Tools of Life Sciences» e «Photonics». Quai tegna er quint fermamain da la structura da las branschas dal chantun Grischun. Il CSEM Landquart è s'etablì dapi sia fundaziun l'onn 2007 ed è daventà in partenari essenzial per interpresas en la regiun.

Contribuziun chantunala per l'Observatori fisical-meteorologic a Tavau

Per la medema perioda (2024 fin 2027) conceda la regenza ina contribuziun annuala da 550'000 francs a l'Observatori fisical-meteorologic a Tavau. La premissa per questa contribuziun annuala dal chantun èn las contribuziuns da finanziaziun annualas da var 1,46 milliuns francs da la Confederaziun e da 710'000 francs da la vischnanca da Tavau.

Tge fa l'Observatori fisical-meteorologic?

Avrir la box Serrar la box

La fundaziun Institut svizzer per la climatologia alpina e la medischina Tavau (ISP) maina a Tavau l'Observatori fisical-meteorologic/Center mundial da radiaziun (OFMT/CMR), ch'è in center internaziunal per la calibraziun d'instruments che mesiran la radiaziun meteorologica. Tals instruments che mesiran la radiaziun meteorologica sviluppa el er per il diever sin terra ed en l'univers, ed el perscrutescha l'influenza da la radiaziun dal sulegl sin il clima da la terra.

En ina cunvegna che datescha da l'onn 1978 e ch'è vegnida renovada periodicamain dapi lura, han il Departament federal da l'intern (represchentà tras MeteoSvizra), il chantun Grischun, la vischnanca da Tavau e la fundaziun ISP reglà la finanziaziun dal OFMT/CMR.

Stiftung Schweizerisches Forschungsinstitut für Hochgebirgsklima und Medizin Davos (SFI)
Legenda: PMOD-WRC

RTR novitads 14:00

Artitgels legids il pli savens