Siglir tar il cuntegn

Header

video
Controversa a Tavau: Gidieus na dastgan betg prender a fit scarsolas
Or da Telesguard dals 12.02.2024.
laschar ir. Durada: 4 minutas 3 Secundas.
cuntegn

Tavau Naginas scarsolas per giasts giudaics

L'ustaria da muntogna Pischa a Tavau è confruntada cun renfatschas d'antisemitissem. Ussa investighescha la polizia chantunala grischuna pervia dal boicot da Gidieus.

L'ustaria da muntogna Pischa a Tavau umilieschia ils giasts giudaics. Cun in scriver en lingua ebraica ha l'ustaria infurmà questa fin d'emna ch'ella n'ha dettia betg pli a fit scarsolas ed auter urden da sport d'enviern a giasts giudaics. La raschun saja ch'i haja dà divers incaps dischagreabels. Ina fotografia dal scriver è vegnida publitgada sin la plattafurma sociala X.

L'ustier da l'ustaria Pischa è entant sa perstgisà per il scriver ed ha prendì giu el. Sco quai ch'el ha ditg envers la RTR, possian giasts giudaics davent da damaun puspè prender a fit scarsolas. El ha entant era accentuà ch'il scriver na saja betg sa drizzà en general envers ils Gidieus, be envers singuls.

«Nov nivel d'impertinenza»

Quai na po il secretari general da la Federaziun svizra da las communitads israelitas, Jonathan Kreuter, strusch crair. El, ch'è actualmain en vacanzas a Tavau, è consternì davart quest scriver, sco quai ch'el ha ditg en l'intervista. Els vegnian a purtar plant en chaussa.

La Federaziun svizra da las communitads israelitas discurra entant d'in nov nivel d'impertinenza. Ch'in'entira gruppa da giasts vegnia chastiada a moda collectiva na saja betg d'acceptar. Per els saja uschia vegnì surpassà in cunfin, betg be moralic. Quai saja ina situaziun schoccanta. Ins vivia en il 21avel tschientaner.

La polizia chantunala grischuna ha entant confermà d'investigar pervia da discriminaziun supponida ed appel ad odi.

Agir cun ferma cumponenta discriminanta

Per il landamma da Tavau, Philipp Wilhelm, ha il scriver da l'ustaria Pischa ina ferma cumponenta discriminanta. Sco quai ch'el ha ditg envers RTR, regordia il scriver a temps e metodas ch'ins na veglia ozendi segir betg pli goutar. Ins na stoppia gnanc discuttar sche talas sajan legitimas u betg.

Betg l'emprim conflict

A Tavau hai gia pliras giadas dà conflicts cun giasts giudaics – la davosa giada la stad cura ch'in video ha fatg grondas undas en las raits socialas. Il video mussa Gidieus che van a spass sin la via da mountainbike.

Las reproschas envers ils giasts giudaics èn ch'els mussian pauc respect, na sa tegnian betg vi da las reglas e laschian enavos rument. Per meglierar la situaziun aveva l'Uniun turistica da Tavau, ensemen cun la Federaziun svizra da las communitads israelitas, lantschà il 2019 in project cun intermediaturs. La finamira dal project era da sensibilisar davart las differentas culturas. Suenter be quatter onns è quest project da dialog però gia vegnì sistì – a moda unilaterala da l'Uniun turistica da Tavau.

Il proxim pass fiss stà che l'Uniun turistica avess gì da fundar ina taskforce. Or da questa n'hai però anc betg dà resultads.

RTR novitads 15:00

Artitgels legids il pli savens