Tavau vul redimensiunar ses ospital. Oriundamain era quel concepì cun 77 letgs. Quai saja memia grond per il basegn d’ozendi. En l'avegnir duai l’ospital da Tavau perquai anc avair 28 chombras ch’ins po duvrar tenor basegn sco chombras singulas u dublas. E l’ospital duai vegnir construì da nov sin l’areal vegl – cun integrar e sanar parts da l’edifizi existent.
Quai è la varianta ch’il cussegl d’administraziun e la direcziun da la Spital Davos AG, cun la vischnanca da Tavau sco suletta acziunaria – vulan persequitar vinavant. En discussiun èn era stadas las variantas «sanaziun da l’edifizi vegl» e «construcziun nova sin l’areal da la Clinica autalpina». Tenor calculaziuns avess la varianta da sanar l’edifizi existent chaschunà custs da radund 85 milliuns francs, entant che la varianta d’in edifizi nov en il lieu vegl vegn sin maximalmain 70 milliuns.
In edifizi nov sin l’areal da la Clinica autalpina avess chaschunà ulteriurs custs da terren. Tenor communicaziun da la vischnanca n’avess ina cooperaziun cun la clinica betg pudì cumpensar ils custs supplementars.
Segirar la portabilitad finanziala
La vischnanca planisescha da relaschar daivets a la Spital Davos AG. Ella vul surpigliar credits bancars dad 8,45 milliuns francs. Plinavant po ella amortisar in emprest communal da 5,67 milliuns e desister da las pretensiuns che resultan. Damai che questas mesiras surpassan las cumpetenzas dal parlament sto il pievel la finala decider.
60 abitaziuns novas
I dat gia ideas, tge che duai capitar cun la part da l’edifizi vegl che na vegn betg duvrada. Pussaivel fissi da crear 60 emprimas abitaziuns. Quest’opziun na è dentant betg cuntegnida en la calculaziun da custs preschentada uss.
