Update dals 05-10-2023
Quai ch'il «Kleiner Landrat» ha gia decis l'entschatta da l'onn duai uss vegnir fixà en la lescha da construcziun: Concret sut il scumond da construcziun d'enviern. I duai dentant dar excepziuns. Ils disturbis da construcziun stoppian esser supportabels per la populaziun. Uschia duai il «Kleiner Landrat» pudair intervegnir per exempel cun limitar ils projects.
La populaziun po uss anc proponer midadas e protestar. Lura vegn la fatschenta discuttada en il «Grosser Landrat». Il davos pled ha lura la populaziun da Tavau a l'urna.
30-03-2023
En l’emna da Bumaun na duain las preparaziuns per il WEF betg pli avair lieu. Concret vai per las construcziuns temporaras. Quai ha decis il «Kleiner Landrat» da Tavau – damai la suprastanza. Sco la vischnanca scriva hajan las lavurs da preparaziun dal WEF da quest onn disturbà ferm la populaziun ed ils acturs dal turissem.
Cunquai che las datas per il WEF 2024 èn gia fixadas dals 15 fin 19 da schaner, ha il «Kleiner Landrat» decis restricziuns per la construcziun, cunzunt durant l'emna da Bumaun. Tranter auter ston las vias ed ils trottoir da la promenada esser libras durant quest'emna.
En l'avegnir, pia a partir dal 2025, duai l'occurenza vegnir spustada pli lunsch enavos, uschia ch'i na duai insumma betg pli dar cruschadas cun l'emna da Bumaun.