Siglir tar il cuntegn
cuntegn

Grischun Tavau senza il WEF

Il Forum d’economia a Tavau senza Tavau? L’universitad da Son Gagl ha evaluà las consequenzas sch’il forum d’economia WEF bandunass il vitg da Tavau. En ina discussiun al podium è l’evaluaziun vegnida discutada da represchentants da differents interess.

Podi sur dil futur dal WEF
Legenda: da san. Alois Zwinggi, Barbara Janom Steiner, Tarzisius Caviezel, Helen Issler, Paul Petzold, Simone Strauf e Rolf Marugg RTR F. Caduff

In studi da l'univsrsitad da Son Gagl mussa: In gudogn da 50 milliuns francs ha Tavau fatg il 2015 grazia al Forum mudial d'economia WEF. Da remplazzar il gudogn dal WEF saja mo pussaivel sch'ins chatta auters arranschaments che remplazzassan il WEF. Quai saja tenor il studi però quasi impussibel.

Quai na dastga betg esser, ch'il WEF va en in auter lieu. Nus stuain avair quità dal WEF causa ch'el porta enorm bler a Tavau, a la regiun ed al Grischun.
Autur: Barbara Janom SteinerCussegliera guvernativa dal Grischun

Il plan B dal WEF

Las discussiuns davart il Forum mundial d'economia datti tranter auter pervia dal plan «B» dal WEF. Il WEF ha evaluà auters lieus che fissan pussaivels per far il WEF.

Tavau è il lieu il pli adattà per il WEF. Dentond dovri in plan B en in cas extraordinari.
Autur: Alois ZwinggiDirecziun generala WEF

Plinavant n'èn ils responsabels betg dal tut cuntents cun la situaziun actuala a Tavau.
Ils puncts che dattan da discutar:

  • Ils pretschs per hotels, abitaziuns da vacanzas ed autras localitads che sa han augmentà en ils ultims onns. I vegn però tschantschà d'exepziuns.
  • Montascha e fabrica da chasas temporaras da privats.
  • Profiteurs: Interpresas che porfiteschan dal WEF che na han dentant betg da far insatge ni cun il WEF ni cun Tavau.

Represchentats da Tavau ed dal WEF han ditg a la discussiun al podium, ch'els veglian chattar ensemen ina schliaziun.

Sco il WEF dovra era Tavau in plan «B». Quai na po betg esser, che nus essan dependents dad in arranschament. Uschia po il WEF era far squitsch a nus.
Autur: Rolf MaruggDeputà e commember da al partida ecologica da Tavau

Ils contracts tranter il WEF e Tavau van anc fin la fin da l'onn 2018. Per Tavau saja quai ussa impurtant da pudair suttascriver uschè spert sco pussaivel ils proxims contracts per pudair segirar ch'il WEF resta a Tavau.

RR Actualitad 08:00

Cifras WEF 2015

  • 79 milliuns francs gudogn per la Svizra
  • 50 milliuns francs gudogn per Tavau
  • 21% da tut las pernottaziuns a Tavau
  • Schazegiada valur da marketing per Tavau tras las medias passa 87 milliuns francs