A Tavau èn las dispitas pervi dal project «Residenz Park Hotel» per surbajegiar l'areal Derby liquidadas. Ils recurs tar la Dretgira administrativa grischuna e tar la vischnanca da Tavau sajan giud maisa. Las partidas en dispita sajan sa cunvegnidas ha la vischnanca confermà envers las gasettas da la chasa editura Somedia. Sin l'areal da l'hotel Derby, cun ina surfatscha da passa 12'000 meters quadrats duai dar in hotel, abitaziuns gestiunadas e segundas abitaziuns. Cura che las lavurs pudessan cumenzar è anc nunenconuschent.
Gia 2019 aveva il Tribunal federal refusà ils recurs dad abitants cunter ils plans uschia ch'il project ha pudì vegnir planisà en detagl. 2021 ha lura la vischnanca da Tavau dà la lubientscha da bajegiar l'areal Derby. Els hajan sclerì ch'il project previs a Tavau Vitg saja en tut las parts confurm a la lescha da segundas abitaziuns, ils recurs cunter il project hajan els perquai refusà. Or da la vischinanza hai dentant puspè dà resistenza cunter il project, plirs vischins èn ids avant dretgira.