La vischnanca da Tavau vul concentrar il spazi d'abitar vers il center. Quai pretenda la basa legala surordinada tar la planisaziun dal territori. La vischnanca è perquai obligada da mobilisar sias reservas da sulom da bajegiar e da prender mesiras per concentrar il spazi d'abitar. Per cuntanscher questas obligaziuns vegn la planisaziun locala revedida cumplettamain ils proxims onns.
Per evitar ch'i vegnan construidas en il fratemp chaussas che na correspundan betg a la strategia da la vischnanca, ha la suprastanza relaschà gia il schaner 2023 ina zona da planisaziun per tut il territori da la vischnanca. La prolungaziun ch'è uss vegnida decidida, vala fin ils 20 da schaner 2025.
Vinavant pussibel da construir
Projects che correspundian da principi al model directiv dal territori communal ed a la revisiun totala en lavur, possian entant tuttina vegnir realisads. I saja pia vinavant pussibel da construir, simplamain betg cunter il maletg directiv da la vischnanca.
