Els siemian d'ina vita en il chaud – dals utschels e dal café arab. Ma anc uss èn Ziska e Jesko a chasa en la fradaglia. Perquai ch'il Current dal Golf ha chalà da circular è il temp da glatsch rut ora. Il pèrin che spetga ses emprim uffant less sa metter sin via a Neuropa. In lieu che sa chatta en il nord da l'Africa. Era sch'il viadi è privlus e stentus sa decidian els da sa metter en viadi.
Far in zichel beffas
Quai è l'entschatta dal toc da teater «Piz Palü» che ha ils 26 d'october 2021 premiera en la Klibühni a Cuira. Il toc scrit da Julian Grünthal e Meret Hottinger è inspirà dal film german «Die Weisse Hölle von Piz Palü» da l'onn 1929. Il toc da teater saja ina satira, di Julian Grünthal. Ed els fetschian uschia in zichel beffas dals tipics films da munotgna.
Ma nus tractain er ils aspects negativs d'in film da muntogna, da la natira ed il sentiment d'attaschament a la patria. Nua maina quai sch'ins patratga be vid l'atgna patria e sclauda ils problems che capitan dadora?
-
Bild 1 von 4. Era sch'il viadi è lung e privlus sa decida il pèr Jesko e Ziska da viandar a Neuropa. Bildquelle: RTR, Carmen Monn.
-
Bild 2 von 4. Tuttenina s'avra l'isch chasa ed il guid da muntogna Jon vegn viaden. El e uschè stanchel ch'el croda per terra. Bildquelle: RTR, Carmen Monn.
-
Bild 3 von 4. Els trais sa mettan ensemen en viadi sur il Piz Ela envers Samedan. Davent da là vulan els ir vinavant cun il zeppelin fin a Neuropa en il nord da l'Africa. Bildquelle: RTR, Carmen Monn.
-
Bild 4 von 4. Rolf Caflisch suna durant l'entir toc musica sin differents instruments da ritmica. Bildquelle: RTR, Carmen Monn.
Entras temas sco la midada dal clima u la situaziun da corona, hajan els tschertgà materials ch'ins possia cuntinuar. Ed uschia hajan els laschà inspirar dal fil «Die Weisse Hölle von Piz Palü».
Cuntanschan els Neuropa?
Avant che Ziska (giugada da Charlotte Engelbert) e Jesko (Julian Grünthal) sa mettan en viadi vers Neuropa, s'avra lur isch chasa ed in grond um cun barba grischa ed equipament da viandar vegn viaden. Igl è Jon, il guid da muntogna (giugà da Christian Sprecher).
Cun el sa mettan els en viadi sur il Piz Ela fin a Samedan. Nua ch'els vulan alura cuntanscher il zeppelin en direcziun Neuropa. Sche lur plan va si u sch'els ston anc surmuntar il Piz Palü – quai datti da guardar en la Klibühni a Cuira.