Fin l'onn 2011 sajan anc gugent vegnids montads stgaudaments electrics, di Thomas Schmid, il manader da l'Uffizi d'energia dal Grischun, envers il schurnal regiunal da SRF.
Ils motivs principals daco ch'ils stgaudaments electrics eran populars:
- tariffas favuraivlas
- custs d'electricitad bass
- custs d'investiziun bass en cumparegliaziun cun auters sistems da stgaudar
Stgaudaments electrics sajan tenor Thomas Schmid megliers ch'ieli e gas en vista al clima. Effectivs na sajan quests stgaudaments dentant betg e n'hajan perquai nagin futur.
Nagina obligaziun
In'obligaziun da sanaziun, tenor la quala ils possessurs da chasas ston remplazzar en insaquants onns in stgaudament electric, na dettia betg en il Grischun. Auters chantuns han ina tala regla. Avant in pèr onns saja quai gia stà en discussiun. Quai na saja dentant vegnì tras politicamain. Ussa saja il mund d'energia in pau auter, menziunescha Thomas Schmid. En il futur possia perquai sa midar la lescha d'energia. Las obligaziuns da sanar in stgaudament electric possian puspè vegnir discutadas politicamain.
Tar l'uniun da proprietaris na datti dentant actualmain betg in'obligaziun da rumir ils stgaudaments electrics. Il mainagestiun Reto Nick menziuna ch'els sajan cleramain per ina midada a tecnologias orientadas vers il futur. Stgaudaments electrics sajan dentant raschunaivels en tschertas situaziuns sco per exempel en chasas da vacanzas, nua ch'i vegn stgaudà mo paucas emnas l'onn.
Avunda pressiun dal martgà
Il manader da l'Uffizi d'energia n'è betg segir sch'i faschess propi senn d'introducir in'obligaziun da sanar ils stgaudaments electrics. Pervi dal scumond da montar novs stgaudaments electrics èn ils stgaudaments electrics existents passa 10 onns vegls. Blers stgaudaments vegnissan a rumper avant in termin transitoric.
Ina midada vers autras tecnologias sustegna il chantun gia ussa. E cun quai ch'ils pretschs èn per part creschids fermamain, saja il squitsch da midar insatge uschia u uschè avant maun, di Thomas Schmid.
Bleras dumondas en connex cun ils custs
Ils ultims mais han els obtegnì bleras dumondas da proprietaris e proprietarias da chasas cun in stgaudament electric cun dumondas sco ch'els pon spargnar energia e co ch'els pon transfurmar il stgaudament. Ins sentia ussa in grond interess en questa tematica. Chapibel, tenor Thomas Schmid, pertge plansieu fetschia mal en la bursa a la glieud.
