In tal curs ha er la butia da flurs ed iert Urech a Cuira organisà e realisà quest on. Durant duas uras han otg participantas dastgà zambregiar lur tschupè d'advent ed il medem mument han ellas pudì emprender co ch'in tal vegn fabritgà. Tranter quellas eran era ina mamma e sias duas figlias che han nizzegià la saira sco buna chaschun per star da cumpagnia.
Jau n'hai anc mai zambregià mes agen tschupè d'advent ed jau giaud da pudair far quai oz ensemen cun mia mamma e mia sora.
Las dunnas èn stadas lavurusas ed era in u l’auter discurs ha procurà per ina buna atmosfera en lavuratori. Las participantas èn da l'avis, ch'in tschupè fatg sez valia dapli ch'in cumprà e che l'entir process saja er collià cun bellas emoziuns. Betg sco ultim na vai betg mo per il product sco tal, mabain er da passentar ensemen ina bella saira.
Michela Projer, la manadra dal curs, ha plaschair da la lavur e dat gugent vinavant l'inschign manual a las persunas interessadas. Crear in tschupè d'advent saja ina bella lavur ed era betg exnum cumplitgà. I dat dentant tuttina duas, trais chaussas ch'ins sto resguardar durant zambregiar, sco la manadra di.
Impurtant è che las chandailas vegnian fermadas bain e ch’il fundament na vegnia betg memia datiers dal fieu. Uschia pon ins evitar incendis.
Crear ensemen in tschupè d'advent è tenor las dunnas dapli che mo in zichel zambregiar e decorar. I dat interessantas discussiuns, ins ri ensemen ed ins s'allegra sin il temp da Nadal. Far sez il tschupè n'è betg la via la pli simpla, ma ina cun blers auters avantatgs.
Or da l'archiv
Uschia guardavan las impressiuns d'advent or il 1981.
