Ina fin d’emna d’enviern schai davos nus. Cunzunt en la Surselva ed en il Scanvetg hai dà in pulit tatsch naiv – fin 35 centimeters, uschia Ivo Sonderegger dad SRF Meteo. Autras regiuns che èn er en ils auts, sco per exempel en la Val Tujetsch, hai dà be paucs centimeters. El decurs da l’emna, cunzunt tranter mesemna e sonda èsi dentant er vinavant da quintar cun naiv.
En il nord dal chantun fin a 50 centimeters
Cunzunt en il nord dal Grischun poi dar en ils auts 50 centimeters fin in meter naiv nova. Ed er en las vals poi dar tranter 10 e 30 centimeters naiv nova. En il sid èsi er vinavant da quintar be cun pauca u nagina naiv. Co quai va alura enavant l’emna proxima na saja dentant betg pussaivel da dir, uschia Ivo Sonderegger. Insumma saja er per ils proxims dis grev da dir con a bass ch’il cunfin da naiv croda insumma.
Plirs pass fan pausa d’enviern
Suenter la naiv da la fin d'emna èn ulteriurs pass svizzers vegnids serrads per l'enviern. Uschia en il chantun Uri il pass dal Furka ed il Klausen. Il pass Alpsu ed il Gottard restan anc averts, ma be cun equipament d’enviern, scriva la direcziun da construcziun dal chantun Uri. Gia serrads per l’enviern èn il pass dal San Bernardino e il pass dal Susten.
RR actualitad 17:00
