Baiver in café sin ina terrassa è puspè pussaivel en Svizra. Malgrà las temperaturas frestgas èn las terrassas stadas frequentadas en il Grischun. La bun'ura eri anc paucs giasts, da mezdi han dentant tuttina bain inqual persuna giudì il gentar u il café sin ina terrassa.
Sch'il quint va si per nus cun mo avrir las terrassas è uss anc grev da giuditgar
Linus Caduff, possessur dal café Zschaler ed il café Arcas a Cuira, avess gì dapli plaschair sch'els avessan pudì avrir era ils spazis dadens da lur cafés. Mo cun las terrassas restan els numnadamain fitg dependents da l'aura. Uschia n'avra el betg omadus cafés l'entira emna. Era las preparaziuns da mangiativas èn pli cumplitgadas perquai ch'ins sto restar flexibel
Ussa essan nus vid producir pettas, ma sche alura nagina glieud vegn pervi da l'aura, stuain nus en dus dis bittar davent quai.
Memia spert per il «Calanda»
Ina da las ustarias pli frequentadas a Cuira è il Calanda. Ma l'ustiera dal Calanda, Sandra Brunner, na po anc betg avrir oz si'ustaria. I saja ì surprendentamain spert cun la decisiun da puspè pudair avrir las terrassas, uschia ch'ins n'è anc betg preparà per l'avertura.
Suenter bunamain tschintg mais serrads èsi anc ina giada da nettegiar l'entira localitad e pigliar tut en funcziun. Quai cuzza intgins dis, er fin ch'igl è cumprà tut quai ch'i dovra. Uschia quintan ins cun puspè pudair servir il venderdi suentermezdi.
Cunquai ch'igl è be lubì da servir sin terrassa saja stà ina ponderaziun dad insumma avrir la terrassa dal Calanda. I dependia dal dumber da glieud che vegn, ma quai vesian ins pir cun il temp.
