Bunamain 23% damain svieuta en media che l'onn passà han las pendicularas en il Grischun fatg, dapi ch'ellas han avert questa stagiun. Ellas sajan partidas bain en la stagiun d'enviern fin mez december. Sur ils dis da festa hajan ellas dentant sentì ch'ils giasts manchian.
Maximal 11'000 enstagl da 20'000 giasts
Per exempel en l'Arena alva, pia a Flem, Laax e Falera sajan quest onn sur ils dis da festa en media enturn 9'000 giasts stads sin pista. Durant ferms dis da l'onn passà hajan els gì radund 20'000 giasts sin pista, di Eliane Bernasocchi-Volken, responsabla per il marketing e la vendita.
Sumeglianta saja la situaziun tar l'Arena da skis Andermatt Sedrun. Els hajan cunzunt patì perquai che la vart d'Andermatt era serrada, di il schef da la communicaziun, Stefan Kern.
En general hajan ins spetgà dapli giasts sur ils dis da festa. Quai di il directur da las pendicularas da Scuol, Andri Poo, sco er il CEO da las pendicularas da Lai, Peter Engler.
Quittads per ils territoris da skis na fan ils manaders betg, almain uschè ditg ch'els pon laschar avert ils territoris da skis enfin la fin da la stagiun. I dovria però bunas fatschentas il favrer, accentuescha tranter auter Monika Wüest da las pendicularas da San Murezzan.
Ustarias pateschan il pli fitg
Per las ustarias fan insaquants pli gronds quittads. Peter Engler di, ch'el na saja betg segir, sche tut las ustarias en il territori da Lai dumognan da surviver fin la primavaira.
