La Tessitura Valposchiavo è anc ina da las ultimas tessarias en Svizra. Ella è in’interpresa istorica, exista dapi l’onn 1955. La societad Tessitura Valposchiavo è vegnida fundada da l’uniun Pro Grigioni cun l'intent da franar l’emigraziun da las dunnas e da mantegnair la tradiziun artisana dal taisser.
L’avegnir da la Tessitura, quel na guarda però betg ora bain.
La serrada da l'interpresa stat ussa directamain davant porta. Era sche la cuminanza sustegna la Tessitura, i na mancan betg mo ils raps, l’interpresa dovra ina nova entschatta.
I na mancan betg mo ils raps, i manca la direcziun.
Il grond problem para dad esser en connex cun la direcziun e la structura dal manaschi. I manca la direcziun professiunala che sa precis, tge che la tessaria e las emploiadas dovran. En l’istorgia da la Tessitura Valposchiavo deva quai in giada ina direcziun professiunala.
I dovra ina schliaziun enfin ils 13 da favrer 2024
Il termin è definì – fin als 13 da favrer ston ils responsabels avair ina schliaziun – era per il deficit da 40’000 francs. Sch'i na dat nagina schliaziun fin la proxima radunanza dals commembers, alura vegn la Tessitura Valposchiavo serrada.
Serrar la Tessitura fiss in pass trist per l’entira val ed era sche l’entira cuminanza è per l’interpresa dovra quai ussa dapli ch'in miracul.