La stad èn vegnids testads 20 paintgs dal Grischun e Glaruna – 18 da quai dad alps. Da quellas provas ha l’examinaziun mussà che 75% na sajan betg en urden scriva l’Uffizi per la segirezza da victualias dal chantun Grischun. Gia l’onn 2015 aveva l’uffizi crititgà 60% e l’onn 2018 40% da las provas.
In labor ha intercurì las provas da paintg sin la qualitad microbiologica e chemic-fisicala. Cun prender provas tant da l’alp sco er dals posts da vendita en las valladas vegn era valitada la chadaina da sfradentar.
Intgins dals resultats:
- 5 paintgs han surpassà la valur maximala microbiologica.
- 4 provas han gì ina memia auta aciditad (Säurezahl). Quai è in indizi che la chadaina da sfradentar è vegnida interrutta ubain ch’il latg u il paintg èn stads magasinads memia ditg.
- 3 giadas n'era la valur da ph u dal cuntegn da grass betg conform.
- En pli n’è tar 7 paintgs betg stà declerà endretg la data da conservabladad.
Sin las alps vegnia lavurà cun simpels instruments, declera il chemicher chantunal Matthias Beckmann envers SRF. Perquai saja ina gronda sfida da lavurar schuber e pir en il labor vesian ins scherms che na s'audan betg en il paintg. Tals scherms sajan u directamain malsanadaivels ubain ch'els possian lavagar il paintg.
Ils resultats na muntian dentant betg che tut ils products na sajan betg buns, relativescha Matthias Beckmann. Ils responsabels stoppian dentant dar dapli attenziun a l'igiena e la chadaina da sfradentar.