Siglir tar il cuntegn
cuntegn

Grischun Tests da stgaudar na persvadan anc betg

L'ultim onn è stà in schlet onn per il vin grischun. Surtut fradaglias han procurà per 12% pli pauc vin. Perquai vul l'uniun Vin Grischun uss chattar la metoda la pli effizienta per stgaudar las vignas.

Legenda: Guardar il video Viticulturs grischuns vulan far anc dapli «vin bio». Durada 02:02 minutas.
Or da Telesguard dals 11.04.2018.

La seria da tests da stgaudar las vignas n'è anc betg serrada giu. La fin da mars ha l'Uffizi per l'ambient ed il Plantahof fatg tests cun differentas quantitads da chandailas. Plinavant han els empruvà ora il FrostGuard. Quai è quasi in fitg grond favugn. El duess stgaudar ses conturns per trais fin quatter grads.

Per il mument n'è l'anteriur president da Vin Grischun, Georg Fromm, anc betg cuntent cun ils resultads dals tests. Els hajan quintà cun in effect pli grond. Ils ultims tests planisads cun brichets, fan els durant il proxim temp, subit cura ch'igl è fraid avunda.

Biovision 2020

Sper ils tests sa focussescha Vin Grischun quest onn sin la Biovisiun 2020. Quel plan han els preschentà avant in onn. La mira: 60% dal vin grischun duess esser da qualitad biologica. Ultra da quai vulan els duvrar 80% damain erbicids. Durant l'ultim onn han quatter dals 40 viticulturs cumenzà a midar enturn sin bio. Tenor Georg Fromm èn quai anc memia paucs. Durant quest onn vulan els sensibilisar pli ferm lur commembers. En divers lieus prepara Vin Grischun vignas d'exempel. Là han ils viticulturs la pussaivladad da vesair, co ch'ina vigna biologica guarda ora.

Nov president da Vin Grischun

Durant la radunaza da Vin Grischun han il commembers elegì Ueli Liesch sco nov president da l'uniun. Il viticultur da Malans surpiglia quest post da Georg Fromm. Liesch è gia president da l'uniun dals viticulturs da Malans.

RR actualitad 08:00

Legenda: Guardar il video Protecziun cunter scheladas per vignas. Durada 03:41 minutas.
Or da Telesguard dals 22.03.2018.