Ils 3 da mars èn Svizras e Svizzers clamads a l'urna per votar davart duas iniziativas en connex cun rentas:
- L'iniziativa da rentas vul che la vegliadetgna da renta per umens e dunnas vegn augmentada pass per pass sin 66 onns enfin il 2033 e suenter adattada a l'aspectativa da vita.
- L'iniziativa per ina 13avla renta da l'AVS pretenda ina 13avla renta per segirar meglier il minimum d'existenza suenter la pensiun.
Tge resguardar d'emplenir il cedel da votar
Tant la lescha federala davart ils dretgs politics sco er la lescha correspundenta chantunala descrivan cura ch'in cedel da votar n'è betg valaivel. Cuntrari èsi uschia pussibel d'eruir tge criteris che ston esser ademplids per ch'il cedel da votar è valaivel e la vusch quinta. En emprima lingia valan be ils cedels da votar uffizials. Cura ch'i va per scriver si il Gea u il Na èsi da resguardar il suandant:
- scriver a maun
- la voluntad da la votanta u dal votant sto esser explicitamain clera
- il meglier duvrar in culli blau u nair, rispli è però er valaivel
- desister da remartgas ingiuriusas u commentaris.
En la lescha n'èsi betg definì cun tge ch'igl è da scriver sin il cedel da votar. Ins dastga pia duvrar cullis, stilografs, ina colur u er in rispli per nudar il Gea u il Na. Però cusseglia il portal ch.ch - in servetsch da Confederaziun, chantuns e vischnancas - explicit da duvrar in culli blau u nair. Tgi che ha il basegn da far ina correctura duai s'annunziar a temp tar la vischnanca per survegnir là documents da votar novs. Alternativ èsi pussibel da stritgar la resposta fallada e curreger daspera. Il punct central è che la voluntad da la votanta u dal votant è clera – e quai senza dubi. En mintga cas duain votantas e votants desister da duvrar liquids alvs che cuvran il text per far correcturas, scriva ch.ch vinavant.
La finala decida il biro da votaziun sch'il cedel da votar è valaivel u betg.
